Терoарот што го обликува виното

Во Кратово, еден од најстарите градови во Македонија, уште од дамнешни времиња постои длабоко вкоренета традиција на одгледување на винова лоза и производство на вино. Овој регион низ вековите бил познат како место каде лозарството не било само земјоделска активност, туку начин на живот, пренесуван од генерација на генерација.

Кратовското вино во минатото било надалеку прочуено по својот квалитет, карактер и автентичност. Изработувано со традиционални методи, со голема почит кон природата и природниот циклус на грозјето, тоа претставувало симбол на регионот и неговото богатство. Секое домаќинство што се занимавало со лозарство ја чувало својата тајна за совршена берба и ферментација, создавајќи вина со препознатлив печат и силен локален идентитет.

Токму врз ова богато наследство се надоврзува и денешната приказна на лозјата во Кратово, каде традицијата се спојува со современи пристапи во лозарството, со цел да се продолжи и возвиши една долга историја на квалитет и посветеност кон виното.

Во реонот на Кратово, на надморска височина од 650 метри, се простираат лозовите насади на брендот Монтеко. Оваа височина игра клучна улога во квалитетот на грозјето, студените ноќи и умерено топлите денови овозможуваат побавно зреење, што резултира со поголема концентрација на ароми, подобра природна киселост и балансирана структура на идното вино.

Она што дополнително го издвојува овој лозарски регион е неговата вулканска почва – ретка и исклучително вредна основа за врвно винско производство. Вулканските минерални слоеви му даваат на грозјето длабочина, комплексност и препознатлив минерален потпис. Оваа почва природно е богата со елементи кои го стимулираат кореновиот систем на лозата да се развива подлабоко, што резултира со помала родност, но значително повисок квалитет и интензитет на плодот.

Комбинацијата од вулканска почва и 650 метри надморска височина создава уникатен тероар кој е тешко повторлив. Токму оваа природна синергија овозможува лозјата на Монтеко да произведуваат грозје со изразен карактер, чиста сортна арома и препознатлива структура која се пренесува директно во секое вино.

Лозјата се внимателно одбрани и негувани со цел да се зачува автентичноста на кратовскиот тероар.

Секоја сезона претставува резултат на прецизна работа и длабоко почитување кон природните услови – каде квалитетот секогаш има предност пред квантитетот.

Резултатот се вина кои носат силен печат на местото од кое потекнуваат, со јасен идентитет и природна елеганција.