НАШИТЕ ВИНА
100% Темјаника
ТЕМЈАНИКА
Елегантно и ароматично вино со изразена комплексност и повеќеслојна структура, кое плени со интензивни ноти на бело цвеќе, зрела праска и суптилни мускатни нијанси. Краткиот контакт со лушпата додава длабочина и текстурална богатост, отворајќи слоеви на сушени кајсии, суво грозје и нежни медни акорди.
Живата и свежа киселост му дава баланс и го издолжува овошно-свежиот финиш, кој останува елегантен и чист.
Одлично се комбинира со рибни специјалитети, морска храна и лесни предјадења.
Препорачана температура на служење: 8°C
100% Шардоне
ШАРДОНЕ
Монтеко Шардоне претставува хармонија меѓу свежина и суптилна зрелост, со прецизно изграден карактер и елегантна структура.
Во аромата доминираат ноти на орев, свежо печена кора од леб и зрело бело овошје, кои се надополнети со лесна минералност. Виното завршува со дискретна, пријатна горчина која му дава должина и сериозност.
Идеално се комбинира со морски деликатеси, бело месо и разновидни сирења.
Препорачана температура на служење: 9°C
100% Вранец
ВРАНЕЦ
Монтеко Вранец претставува моќен и автентичен израз на македонскиот тероар.
Во аромата се препознаваат богати ноти на зрели црни плодови, сладунец и суптилни зачини, надополнети со изразена свежина и природна киселост. Лесно интегрираните дабови ноти му даваат структура, додека завршетокот е долг, топол и пикантен.
Одлично се комбинира со печено јагне, телешка коленица во кајмак и галичко овчо сирење со џем од боровинки.
Препорачана температура на служење: 16 – 18°C
100% Мерло
МЕРЛО
Елегантно и балансирано Мерло со прецизен овошен израз и фина структура. Во аромата доминираат ноти на црни цреши, кисела слива и дискретни нијанси на диви билки.
Кадифените танини и природната овошна сладост од совршено зрело грозје создаваат долг, мек и сочен финиш. Вино кое ја одразува посветеноста кон лозјата и прецизноста во визбата.
Одлично се комбинира со бавно печено месо, пире од целер, тестенини со вргањ и мајчина душица, како и чоколадни десерти со вишни.
Препорачана температура на служење: 16 – 18°C
100% Каберне Совињон
КАБЕРНЕ СОВИЊОН
Потекнува од лозјата под вулканските височини на Кратово, каде уникатниот тероар создава вино со силен карактер и прецизна структура.
Во аромата се препознаваат свежо црвено овошје, пикантни зачини и суптилни димени и дабови нијанси. Виното е елегантно, свежо и прецизно балансирано, со долготраен и чист финиш.
Претставува автентичен израз на планинскиот дух и современото винско мајсторство.
Одлично се комбинира со бифтек, рамстек и печени ребра со рузмарин и карамелизирани моркови.
Препорачана температура на служење: 16 – 18°C
50% Каберне Совињон, 50% Мерло
НЕРО
Софистициран и смел купаж од Мерло и Каберне Совињон, создаден од високопланински лозја каде ладните ноќи ја зачувуваат свежината, аромите и природната киселост на грозјето.
Продолжената мацерација на контролирани ниски температури овозможува екстракција на длабоки слоеви на темно шумско овошје, зачини и суптилни цветни тонови. Виното се одликува со кадифена текстура, елегантни танини и прецизно избалансирана структура.
Одраз на планински тероар и внимателно винско мајсторство, Неро нуди богат, но рафиниран гастрономски потенцијал.
Одлично се комбинира со коленица, ребра, јагнешки котлети и сино сирење.
Препорачана температура на служење: 16 – 18°C
50% Каберне Совињон, 25% Мерло и 25% Вранец
ФИЛИП
Живописно и префинето црвено вино со чист и јасен овошен израз, каде доминираат ноти на зрела капина, цреша и слива.
Создадено без употреба на даб, со цел да се зачува автентичниот и непреработен планински карактер на сортата. На непце е елегантно, со свиленкасти танини, суптилна пикантност и долг, хармоничен финиш.
Одлично се комбинира со дивеч, печено говедско месо и тврди овчи сирења.
Препорачана температура на служење: 16 – 18°C
100% Каберне Совињон
ВОЛКАНО
Каберне Совињон од селектирано сопствено лозје на вулканските почви во Кратово (над 600 м н.в.). Рачна берба, зреена 14 месеци во буриња Seguin Moreau Icône. Ова вино се одликува со графитни ароми, ноти на црвено овошје, зачини и чиста свежина. Вистинско отелотворение на македонскиот тероар.
Одлично се комбинира со црвени меса, црно чоколадо, ореви, суви сливи или смокви.
Препорачана температура на служење: 16 – 18 °C.
вински пристап
ТЕРОАР, СОРТА И ПРЕЦИЗНОСТ
Во Монтеко, виното започнува од лозјето. Внимателната селекција на грозјето, контролираниот процес во визбата и почитта кон природниот карактер на секоја сорта создаваат вина со чист израз, балансирана структура и долготраен впечаток.
Нашата цел не е да го промениме тоа што природата го дала, туку да го истакнеме на најдобар можен начин.
