Таму каде што виното се претвора во спомен

Винаријата Монтеко претставува срцето на целата винска приказна – место каде традицијата и современата технологија се спојуваат во совршена хармонија. Со годишен капацитет од околу 300.000 литри, таа е дизајнирана да овозможи целосна контрола врз секоја фаза од производството, од првиот контакт на грозјето со визбата, до финалното зреење во шише.

Во рамките на винаријата се создаваат сите стилови на вина – внимателно балансиран спектар од црвени, бели и розе вина, секое со свој јасен карактер и израз. Од Есен 2026, портфолиото се проширува со нова димензија на елеганција – Пенливи вина произведени по традиционална метода, кои дополнително ја заокружуваат винската приказна на Монтеко и ја подигнуваат на уште повисоко ниво.

Внатрешноста на винаријата е целосно реконструирана и технолошки модернизирана, при што оригиналната структура е задржана, но целосно прилагодена на современи вински стандарди. Просторот е опремен со иноксни танкови со различен капацитет, со прецизна температурна контрола, кои овозможуваат стабилна и контролирана ферментација за секоја сорта посебно. Целата опрема е од реномираниот италијански производител Enoveneta, што гарантира високо ниво на прецизност и сигурност во секој чекор од процесот.

Секоја берба започнува со целосно рачна селекција на грозјето, со што се гарантира дека во визбата влегува само најквалитетниот плод. Ферментацијата се одвива под строго контролирани услови, со примена на прецизно водена технологија и, во одредени случаи, продолжена мацерација за подлабок екстракт и поголема ароматска комплексност.

Пристапот е внимателно балансиран – меѓу класичната винска дисциплина и современата техничка прецизност.